Judges 11

1Gilead-te, Jephthah a thahat galhang khat ahi hi. A pa Gilead hi-a, a nu numei kizuak khat ahi hi. 2Gilead zi in zong tapa mah nei-a, amaute a gol uh ciangin Jephthah a hawlkhia uh hi. Amaute in, “Nang numei dang khat tapa na hi manin ko innkuan sungah luah bangmah na ngah kei ding hi,” a ci uh hi. 3Tua ciangin Jephthah a sanggamte kiang panin taikhia a, Tob gamah tengin tua lai-ah mi ngoltol pawlkhat kikhawmin amah a zui uh hi. ^a

4 Tua nung a sawt lo, Ammon-te in Israel tungah gal a phuan uh ciangin, 5Gilead-a upate, Jephthah sam dingin Tob gamah a pai uh hi. 6Amaute in, “Hong pai-in hong makaih lecin Ammon-te i do thei ding hi,” a ci uh hi. ^b

7 Jephthah in amaute kiangah, “Hong mudahin ka pa inn pan nong hawlkhiatsa uh hi lo hiam? Na lungkham uh ciangin bang hang kei kiangah hong pai na hi uh hiam?” a ci hi. ^c

8 Gilead upate in ama kiangah, “Bangbang ahi zongin tu-in nang lama hong kihei ka hi uh hi, Ammon-te do dingin hong zui in, Gilead a tengte khempeuh lutang in nong om ding hi,” a ci uh hi.

9 Jephthah in, “A zenzenin Ammon-te do dingin hong ciahpih kikin TOPA in amaute kei khutah hong piak leh - na lutang uh ka hi taktak ding hiam?” ci-in a dawng hi. ^d

10 Gilead upate in, “TOPA ka teci uh ahi hi; na gen bangin ka hih taktak ding uh hi,” ci-in a dawng kik uh hi. 11Tua ciangin Jephthah in Gilead upate zui-a, mite in amah lutangin nei uh a amaute makaipi in a koih uh hi. Tuateh hih a kammalte khempeuh Mizpah a TOPA mai-ah a gen pha kik hi. ^e

12 Tua ciangin Jephthah in Ammon-te kumpipa kiangah kamtai khat sawla: “Ka gam uh nong sim nadingun ko tungah bang lungkimlohna nei na hi uh hiam?” ci-in a dongsak hi.

13 Ammon-te kumpipa in Jephthah kamtaite kiangah, “Israel-te Egypt pan hong paikhiat toh lai-un Jordan lampi dung tengah ka gam uh Arnon pan Jabbok dong hong laksak uh hi. Tu-in thudamtakin hong pia kik un,” ci-in a dawng uh hi. ^f

14 Jephthah in Ammon-te kumpipa kiangah kamtai sawl kik a: 15“Jephthah gen hih ahi hi:

Israel in Moab gam ahi a Ammon-te gam ahi zongin a laksak kei hi. 16Ahi hangin Egypt pan hong paikhiat toh un, sehnel-gam kantanin San Tuipi a ah Kedesh dong a tung uh hi. 17Tua ciangin Israel in Edom kumpipa kiangah kamtai sawla, ‘No gam kantanin hong paisak un,’ a cihsak hangin Edom kumpipa in a thu ngai lo hi. Moab kumpipa kiangah zong sawl a, amah in a nial hi. Tua ciangin Kedesh ah Israel a tam phot hi.
18 “Tua zomin amaute sehnel gam tengah zin kawikawi-in Edom le Moab gamte kimvelin pai uh a, Moab gam nisuahna lampang tawnin Arnon galah giahphual a sat uh hi. A gamgi Arnon ahi manin amaute Moab gam sung a lut kei uh hi.
19 “Tua ciangin Heshbon a kumpi a sem Amor-te kumpipa Sihon kiangah Israel in kamtai sawla, ‘Ko muna ka pai nadingun na gam hong kantansak in,’ a ci hi. 20Ahi hangin Israel b in a gam a kantan ding Sihon in a muang zo kei hi. A mite khempeuh kikhawmsakin Jahaz ah giahphual sat uh a Israel tawh a kido uh hi. ^g
21 “Tua ciangin TOPA Israel’ Pasian in Israel’ khutah Sihon le a mite khempeuh pia-a amaute in a zo uh hi. Israel in tua gama teng Amor-te gam khempeuh la khina 22Arnon pan Jabbok le sehnel-gam pan Jordan dong a vekin a la khin uh hi. ^h
23 “Tu-in TOPA Israel’ Pasian in ama mi Israel mai-ah Amor-te a hawlkhiat nungsangin no ngah theih nading bang thu nei na hi uh hiam? 24Nang na pasian Chemosh hong piak tang lo ding na hi hiam? Tua mah bangin TOPA kote Pasian in ko hong piaksate ka tang ding uh hi. 25Moab kumpipa Zippor’ tapa Balak sangin hoihzaw na hi hiam? Amah Israel tawh kitawngin kido ngei ahi hiam? 26Israel in Heshbon, Oroer a kima tengte le Arnon dunga khuapite khempeuh kum zathum sung a neihsa uh ahi hi. Bang hangin tua hun sunga la kik lo na hi uh hiam? 27No tungah ka khial kei hi, ahi hangin note in nong simna uh tawh kei tungah na khial khin uh hi. Tuni-a Israel le Ammon-te kikal-a kitotna ah TOPA in Thukhenpa c semin thu khentat ta hen,” a ci hi. ⁱ

28 Ahi zongin Ammon kumpipa in Jephthah thupuak a thusim kei hi.

29 Tua ciangin Jephthah tungah TOPA Kha a tung hi. Amah in Gilead le Manasseh kantanin Gilead a Mizpah nawksuak a tua panin Ammon-te sim dingin a kuan hi. 30Tuateh TOPA tungah Jephthah kiciama, “Ka khut sungah Ammon-te nong piak leh 31Ammon-te tunga gualzo a ka ciah ciangin ka inn kongkhak pana hong dawna hong pusuak masa penpen TOPA ading hi dinga, meihal biakna-in kong pia ding hi,” a ci hi. ^j

32 Tua ciangin Ammon-te sim dingin Jephthah kuankhia a, TOPA in a khut sungah amaute a pia hi. 33Amah in Aroer panin Minnith kiang mahmah a Abel Karamim ciang dong khua sawmnih a vatmai hi. Hih bangin Israel in Ammon a nuaisiah hi. ^k

34 Mizpah a, a inn ah Jephthah a ciah ciangin amah dawn dingin kuama dang pusuak lo-a, a tanu khuangneu tumin lamsa-in pusuak masa mawk hi! Ama a ta khat neihsun ahi hi. Amah longal tanu ahi a tapa ahi zongin a nei kei hi. 35Amah in tuanu a muh ciangin a puan balkekin kap-a,” Oh! Ka tanu! Hong lunggimsak hong neusak sicia maw, bang hang hiam cih leh ka palsat theih loh dingin TOPA tungah ka kiciam hi,” a ci hi. ^l

36 Tuanu in, “Pa aw, TOPA tunga na kiciamsa ahi hi. Tu-in TOPA in na gal Ammon-te tungah phu hong laksak hi, na ciamsa bangin kei tungah hih in. 37Ahi hangin hih kong ngetna khat hong pia in: Pasal nei ngei lo ding ka hi manin mual tungah ka lawmte tawh kap-a ka vak kawikawi theih nadingin kha nih hun hong pia in,” a ci hi.

38 Amah in, “Pai in,” a ci hi. Tuateh kha nih a paisak hi. Tuanu numeinote tawh mualtungah pai uh a, pasal nei ngei lo ding ahi manin a va kap uh hi. 39Tua kha nih a cin ciangin a pa kiangah ciah kika, a pa in a kiciamsa bangin a tanu tungah a hih hi. Tua ciangin amah nungak bit ahi hi.

Hih thu panin Israel-te ngeina pianga 40kum simin Gilead-te Jephthah’ tanu phawkna-in Israel numeinote nili a paikhia uh hi.